Olympesch Gëtter

Den Olymp, de Wunnsëtz vun den olympesche Gëtter an der griichescher Mythologie.

D'Olympesch Gëtter (gr.: τὸ Δωδεκάθεον / to Dodekatheon), och Olympioi oder Olympier, waren déi zwielef (gr.: δώδεκα / dodeka) Haaptgëtter an der griichescher Mythologie.

Hire Wunnsëtz war de Bierg Olymp (gr.: Ὄλυμπος / Olympos) a Griicheland. Si entspriechen den zwielef Méint vum Joer souwéi den zwielef Déierekreeszeechen.

D'Olympier waren d'Grupp vun de Gëtter ronderëm den Zeus, deen no schwéiere Kämpf säi Papp Kronos an deem seng Gesëschter, an domat d'Titanen, déi virun him un der Muecht waren, gestierzt huet (Titanomachie). Heibäi gouf hie vun de Kyklopen ënnerstëtzt, si hunn him och de Blëtz an den Donner ginn. Ausserdeem waren Hekatoncheiren a seng Mamm Rhea op senger Säit.

Les douze Olympiens vum Nicolas-André Monsiau.

Nodeem den Zeus d'Titanen an den Tartaros gestierzt hat, huet hie seng Herrschaft géint d'Nokomme vun den Titane missen ofsécheren. Fir géint d'Nokommen ze gewannen, huet hien d'Styx missen ëm Hëllef bieden, an hei hunn d'Olympier och nach spéider hir Eede geschwuer. Sou goufen och d'Nokommen an den Tartaros agespaart. Well sech weder den Okeanos, nach d'Tethys an d'Themis um Opstand vun den Titanen, déi iwwereg bliwwe waren, géint den Zeus bedeelegt haten, huet den Zeus hinnen d'Herrschaft iwwer hiert Räich gelooss.

No den Titanen hu sech d'Olympier misse géint d'Gigante behaapten (Gigantomachie). Heibäi krute si besonnesch Hëllef vum stierflechen Herakles, dee spéider och an den Olymp opgeholl ginn ass, an d'Hebe bestuet huet. Domat gouf d'Hebe, déi de Gëtter den Nektar bruecht huet, vum Ganymed ofgeléist. Och dëse Kampf konnt den Zeus fir sech entscheeden, a sou konnt hie mat senge Gesëschter d'Weltherrschaft untrieden. Duerch d'Lous gouf entscheet, datt den Zeus "den Himmel" géif kréien, de Poseidon "d'Mier", an den Hades "d'Ënnerwelt".

Schliisslech hu sech d'Olympier misse géint den Typhon duerchsetzen. Wéi hie mat gliddege Steng ronderëm sech gehäit huet, a gejaut huet, datt ee bal daf ginn ass, sinn d'Olympier fir d'éischt emol geflücht. Doropshin hu si sech an Déiere verwandelt; den Zeus an e Widder, den Apollo an e Kueb, den Dionysos an e Geessebock, d'Artemis an eng Kaz, d'Hera an eng Kou, d'Aphrodite an e Fësch an den Eos an en Ibis. Och den Ares huet sech an e Fësch verwandelt, de gewaltegen Herakles an e Réi, d'Leto an e Wisel, an den Hephaistos a e Stéier. Sou sinn si an Egypten geflücht, dem ale Land vun der Wäisheet, bis den Zeus den Typhon bändege konnt.

Domat war den Zeus de Grënner vun der drëtter Weltuerdnung.

Other Languages
Afrikaans: Olimpiese gode
aragonés: Olimpians
azərbaycanca: Olimp tanrıları
беларуская: Алімпійскія багі
беларуская (тарашкевіца)‎: Алімпійскія багі
català: Olímpics
čeština: Olympané
Esperanto: Olimpanoj
hrvatski: Olimpski bogovi
Bahasa Indonesia: 12 Dewa Olimpus
íslenska: Ólympsguðir
italiano: Olimpi
Basa Jawa: 12 Déwa Olimpus
latviešu: Olimpa dievi
lietuvių: Olimpo dievai
македонски: Олимписки богови
Bahasa Melayu: 12 Dewa Olympus
Nederlands: Olympische goden
norsk nynorsk: Dei olympiske gudane
پنجابی: 12 اولمپی
Plattdüütsch: Olympsche Gödder
português: Deuses olímpicos
sicilianu: Olimpi
Simple English: Twelve Olympians
slovenčina: Olympskí bohovia
slovenščina: Dvanajst bogov Olimpa
српски / srpski: Олимпски богови
srpskohrvatski / српскохрватски: Olimpska božanstva
Türkmençe: Grek Taňrylary
українська: Олімпійські боги
vepsän kel’: Olimpalaižed jumalad